Traballos de especial risco en plantas de biomasa.
Os traballos en altura e os espazos confinados están considerados entre as actividades con maior nivel de risco dentro das instalacións industriais. No sector da biomasa, tarefas como o acceso a silos, a inspección de caldeiras, o mantemento de filtros ou as intervencións en cubertas e estruturas requiren coñecementos específicos e a aplicación de rigorosos protocolos de seguridade.
Co obxectivo de reforzar a capacitación dos profesionais do sector, o Clúster da Biomasa de Galicia organiza o curso “Traballos de especial risco en plantas de biomasa”, unha formación especializada que permitirá aos participantes identificar os principais factores de risco, coñecer as medidas preventivas necesarias e adquirir competencias prácticas para desenvolver estas tarefas con seguridade.
Esta acción formativa conta cun enfoque eminentemente práctico e está especialmente deseñada para responder ás necesidades reais das empresas da cadea de valor da biomasa.
Esta formación está orientada a profesionais vinculados ás plantas e instalacións de biomasa, incluíndo persoal de mantemento, operarios, equipos de primeira e segunda intervención, responsables de seguridade, responsables de planta, mandos intermedios e persoal directivo ou xerencial interesado en reforzar os coñecementos da súa organización en materia de prevención de riscos laborais, seguridade industrial e actuación ante situacións de emerxencia.
Equipo docente
Cal é a estrutura e o desenvolvemento deste curso formativo?
O programa comprenderá un total de 16 horas divididas en 2 sesións de 8 horas cada unha delas cun formato presencial
Bloque 1. Riscos e seguridade en espazos confinados
- Accidentabilidade en espazos confinados e análise dos principais accidentes rexistrados en contornas de biomasa.
- Causas máis frecuentes dos accidentes en silos, fosos, condutos e instalacións industriais.
- Identificación e avaliación dos factores de risco presentes nas plantas de biomasa.
- Definición, recoñecemento e clasificación dos espazos confinados.
- Avaliación de riscos xerais e específicos asociados ás instalacións de produción de biomasa.
- Medidas preventivas aplicables ás operacións realizadas nestas contornas.
Bloque 2. Procedementos de traballo seguro
- Planificación e organización dos traballos en espazos confinados.
- Avaliación da atmosfera e planificación das medicións.
- Sistemas de ventilación e control ambiental.
- Equipos de protección individual (EPIs).
- Protocolos de actuación e plans de rescate en instalacións de biomasa.
Bloque 3. Formación práctica e simulacións reais
A parte práctica desenvolverase mediante exercicios e simulacións baseadas en situacións reais presentes nas plantas de biomasa:
- Acceso seguro a silos de almacenamento de astela.
- Traballos de limpeza e mantemento en filtros de mangas.
- Procedementos de control e rexistro ao rematar unha intervención.
- Simulacións de rescate en espazos confinados.
- Actuación ante a presenza de gases perigosos e utilización de detectores de gases.
- Montaxe e utilización de sistemas de acceso, permanencia e rescate.
- Acceso ao interior de caldeiras para tarefas de inspección.
- Prácticas de evacuación e encamillado.
Que inclúe este curso?
Ao longo das dúas xornadas abordaranse os riscos específicos asociados aos traballos en altura e aos espazos confinados en plantas de biomasa, así como os procedementos de traballo, os equipos de protección individual, os sistemas de rescate e as medidas preventivas necesarias para garantir a seguridade das persoas traballadoras.
A formación incluirá demostracións e exercicios prácticos en escenarios que recrean situacións reais de traballo presentes nas instalacións de biomasa.
Recordamos que os alumnos/as que participen nesta actividade deberán garantir unha asistencia obligatoria a totalidade do curso para obter o correspondente certificado de aproveitamento.
Traballos de especial risco en plantas de biomasa.
Prazo de inscricións: finalizado
- 18 de xuño | Traballos en alturas
- 25 de xuño | Espazos confinados
- 07:00- 15:00 hrs
- Modalidade presencial | Instalación Verticalia, Redondela
Actividade cofinanciada por Axencia Galega da Industria Forestal
