O Clúster da Biomasa de Galicia celebrou a segunda sesión do programa formativo “Construíndo e consolidando equipos para o futuro da biomasa”, unha iniciativa orientada a reforzar as capacidades das empresas do sector na captación, selección e consolidación de equipos.
Nesta ocasión, a sesión estivo conducida por Carmen Vázquez, profesional con ampla experiencia en xestión de persoas e desenvolvemento de equipos directivos, quen abordou de maneira práctica ferramentas e procesos orientados a optimizar a selección de talento.
Ferramentas para tomar mellores decisións
A xornada centrouse na análise de metodoloxías que permiten estruturar procesos de selección máis eficientes, reducir erros na contratación e aliñar os perfís profesionais cos obxectivos estratéxicos das organizacións.
As persoas participantes traballaron sobre casos prácticos, reflexionando sobre criterios de avaliación, definición de perfís e identificación de competencias clave nun contexto empresarial cada vez máis competitivo.
As persoas, eixo da competitividade
O programa parte dunha premisa clara: a adquisición e consolidación de talento non é un proceso administrativo, senón unha decisión estratéxica que impacta directamente na sustentabilidade e no crecemento das empresas.
Con esta segunda sesión, o Clúster xunto coa Axencia Galega da Industria Forestal (XERA) continúan impulsando unha visión da xestión de persoas como factor clave para fortalecer o tecido empresarial da biomasa en Galicia.
O programa continuará nas vindeiras semanas, afondando en liderado, compromiso e desenvolvemento de equipos como piares fundamentais para o futuro do sector.
