A entidade participou xunto a outras organizacións e empresas na sesión impulsada pola Consellería de Medio Ambiente e Cambio Climático para identificar oportunidades de colaboración e avanzar cara a un mellor aproveitamento dos recursos
O Clúster da Biomasa de Galicia participou na primeira reunión do Grupo de Traballo de Simbiose Industrial – Zona Sur, unha iniciativa impulsada pola Consellería de Medio Ambiente e Cambio Climático, a través da Oficina de Economía Circular Industrial, co obxectivo de coñecer as necesidades do tecido empresarial e identificar novas oportunidades de colaboración entre sectores.
A sesión, celebrada nas instalacións da Confederación Empresarial de Pontevedra (CEP), en Vigo, reuniu a 22 entidades de diferentes sectores económicos, que compartiron experiencias, necesidades e posibles ámbitos nos que establecer novas conexións para avanzar na aplicación da simbiose industrial en Galicia.
A participación do Clúster permitiu achegar a perspectiva do sector da biomasa a este espazo de traballo, un ámbito no que a cooperación entre empresas e sectores pode desempeñar un papel especialmente relevante.
A biomasa, parte dunha economía máis circular
A simbiose industrial baséase na procura de conexións entre diferentes actividades económicas para favorecer un mellor aproveitamento de recursos, materiais, servizos, infraestruturas ou enerxía, sempre dentro do marco técnico e normativo aplicable.
Un enfoque estreitamente relacionado coa propia cadea de valor da biomasa, na que o aproveitamento eficiente e sostible dos recursos forestais permite transformar recursos locais en enerxía renovable, xerar actividade económica e favorecer modelos produtivos máis circulares.
Para o Clúster da Biomasa de Galicia, participar neste tipo de espazos permite tamén establecer pontes con outros sectores, coñecer novas necesidades empresariais e explorar posibles oportunidades de cooperación nas que a biomasa e as capacidades das empresas que integran o seu ecosistema poidan achegar solucións.
A reunión permitiu realizar unha primeira aproximación ás oportunidades e necesidades existentes entre as entidades participantes, sentando as bases para continuar avanzando no traballo conxunto arredor da simbiose industrial.
Cooperación para avanzar na economía circular
A participación neste grupo de traballo enmárcase na aposta do Clúster por reforzar a cooperación empresarial, favorecer a innovación e impulsar novas oportunidades para o sector da biomasa, especialmente a través da súa conexión con outras cadeas de valor.
Desde o Clúster da Biomasa de Galicia queremos agradecer á Consellería de Medio Ambiente e Cambio Climático e á Oficina de Economía Circular Industrial a invitación a participar nesta primeira sesión, así como a posta en marcha de espazos de diálogo que permiten incorporar a visión das empresas e entidades á identificación de novas oportunidades de simbiose industrial.
O obxectivo do Clúster participando neste tipo de iniciativas é dar visibilidade ás capacidades do sector, crear novas conexións e contribuír ao avance dunha economía galega máis circular, eficiente e sostible.
