O Clúster da Biomasa de Galicia organiza o xoves 23 de abril, un novo obradoiro centrado na mellora da sustentabilidade do sector e no impulso da industria verde a través de tecnoloxías ambientais, no marco do ciclo de obradoiros de dixitalización e industria verde impulsado pola entidade.
A xornada terá lugar no Centro GaiasTech da Cidade da Cultura e reunirá a profesionais e entidades de referencia do ecosistema da biomasa, nun espazo orientado á análise práctica dos retos e oportunidades asociados á transición cara a modelos produtivos máis sostibles, eficientes e innovadores.
O acto de apertura contará coa participación de Eladio Otero García, subdirector de Competitividade do Instituto Galego de Promoción Económica (IGAPE); María Vázquez García, vicepresidenta do Clúster da Biomasa de Galicia e directora do Grupo Gestán; e Josefa de León Blanco, presidenta do Clúster Viratec, quen porán en valor a importancia da colaboración e da innovación como elementos clave para avanzar na competitividade do sector.
Ao longo da xornada abordaranse cuestións vinculadas á mellora dos procesos produtivos, á aplicación de tecnoloxías ambientais e ao papel da dixitalización na optimización da eficiencia empresarial. Neste contexto, participarán profesionais de entidades como Kaizen Institute Western Europe, Xilonor, Gesuga, Ecoforest, CETIM Technological Centre e Vertex Bioenergy, que compartirán experiencias e casos reais de aplicación de solucións innovadoras no ámbito da biomasa.
O programa estrutúrase en diferentes bloques temáticos orientados a ofrecer unha visión aplicada, desde o diagnóstico inicial ata a execución de proxectos e a avaliación do seu impacto, incorporando exemplos concretos de implementación en empresas do sector.
Así mesmo, a xornada incluirá un relatorio centrado nas oportunidades de financiamento para proxectos colaborativos innovadores, así como unha dinámica grupal baseada en Design Thinking, na que as persoas participantes poderán traballar sobre retos ambientais reais e explorar solucións a través da colaboración e a innovación.
O encontro completarase con espazos de networking, favorecendo o intercambio de coñecemento e a xeración de sinerxías entre empresas, entidades e profesionais do sector.
Este obradoiro forma parte dun ciclo máis amplo impulsado polo Clúster da Biomasa de Galicia, que ten como obxectivo acompañar ás empresas na súa transformación dixital e sostible, reforzando a súa competitividade nun contexto de transición enerxética e ecolóxica.
Para poder asistir é necesario inscribirse nesta ligazón.
A actividade conta co financiamento do Instituto Galego de Promoción Económica (IGAPE), no marco do apoio ás iniciativas dos clústeres innovadores que contribúen ao desenvolvemento do tecido empresarial galego.
