O Clúster Biomasa de Galicia súmase á Alianza Galega polo Clima, unha iniciativa que promove a colaboración entre diferentes actores sociais, económicos e institucionais co obxectivo de impulsar medidas comúns e coordinadas fronte ao cambio climático en Galicia.
Esta Alianza reúne empresas, colexios profesionais, sindicatos, organizacións medioambientais, entidades da sociedade civil e administracións públicas comprometidas coa mellora do medio ambiente, o avance nos Obxectivos de Desenvolvemento Sustentable (ODS) e o cumprimento da Axenda 2030.
A adhesión do Clúster reflicte o seu compromiso coa sustentabilidade forestal e o desenvolvemento de solucións baseadas na biomasa como enerxía renovable. Como entidade que traballa na promoción de alternativas sostibles e na redución de emisións de CO₂, o Clúster Biomasa de Galicia aposta pola cooperación como ferramenta clave para alcanzar unha Galicia máis verde e neutra en carbono.
A través desta colaboración, esperamos sumar esforzos e compartir coñecemento para xerar un impacto positivo no medio ambiente, fomentando accións coordinadas que contribúan á transición ecolóxica do noso territorio.
Desde o Clúster, queremos agradecer a oportunidade de formar parte desta iniciativa e reafirmamos o noso compromiso cun futuro máis sostible para Galicia.
