APROEMA convoca a VII edición dos Premios Medio Ambiente

A Asociación Profesional de Empresas Medioambientais (APROEMA) abre a convocatoria da VII edición dos Premios “Medio Ambiente APROEMA”, unha iniciativa que busca recoñecer accións e proxectos en favor da sustentabilidade e a protección do medio ambiente en Galicia.

O obxectivo destes galardóns é impulsar a conciencia ambiental e fomentar iniciativas públicas e privadas que contribúan á conservación dos valores naturais e ao desenvolvemento sostible, mediante o recoñecemento público a entidades que destacan pola súa traxectoria ou por proxectos singulares neste eido.

Quen pode presentar candidatura?

Poderán optar a estes premios:

Entidades públicas (Concello, Deputacións, Mancomunidades).
Entidades privadas (asociacións empresariais, de consumidores, veciñais, xuvenís, culturais, educativas, etc.).
Empresas (prestadoras de servizos, enxeñarías, consultorías ambientais, xestores de residuos, fabricantes de bens de equipo, etc.).
Centros académicos (universidades, centros de secundaria, formación profesional e educación primaria).

Cada entidade poderá presentar ata 3 candidaturas por modalidade.

Dotación

As entidades galardoadas recibirán:

Unha estatuíña conmemorativa
Un diploma acreditativo
Difusión na revista Galiambiental durante un ano
Invitación a todos os eventos de APROEMA no mesmo período

Recoñecemento á Excelencia Ambiental

Ademais, establécese un Recoñecemento Especial á Excelencia Ambiental, destinado a destacar experiencias innovadoras con gran valor socioeconómico e transferible, capaces de inspirar á industria galega a avanzar máis alá do cumprimento normativo, impulsando a mellora continua e a competitividade empresarial.

Presentación de candidaturas

As candidaturas deberán presentarse exclusivamente en formato electrónico, a través do formulario dispoñible e enviando a documentación complementaria ao correo: premiosmedioambiente@aproema.com.
O prazo remata o 15 de outubro de 2025.