A directora xeral da Axencia Galega de Desenvolvemento Rural, Inés Santé, clausurou a asemblea do clúster galego
A directora xeral da Axencia Galega de Desenvolvemento Rural, Inés Santé, foi a encargada de clausurar a asemblea xeral do clúster da biomasa de Galicia. Alí puxo en valor o convenio de colaboración asinado entre esta entidade e a Xunta para pór en marcha unha serie de accións que melloren e actualicen a vida e as industrias do medio rural mediante o fomento da biomasa local e outras enerxías sostibles que garantan a súa autosuficiencia enerxética.
O acordo compromete á axencia galega e ao Clúster a apoiar os diferentes proxectos privados que se fagan para mellorar a posta en valor da biomasa como fonte de enerxía renovable e autóctona, así como para potenciar a bioenerxía. Ambas entidades explorarán tamén as formas de financiar proxectos estratéxicos de interese mutuo, cunha especial énfase en implementar a bioenerxía no rural e divulgar conxuntamente boas prácticas e proxectos innovadores de economía circular neste campo.
O convenio pretende, ademais, cubrir necesidades como a de avaliar a situación e o potencial da biomasa na comunidade ou a de conseguir un desenvolvemento sostible que axude ademais a reducir as emisións de carbono. Nisto será clave o ámbito rural, xa que a biomasa é unha fonte de enerxía cun potencial significativo nesta contorna e, á súa vez, as zonas rurais son elementos esenciais na loita contra o cambio climático e na consecución dun desenvolvemento sostible a escala local.
Fonte: La Voz de Galicia
